Продолжуваме со беспоштедна и одлучна битка за да кажеме не на сиромаштијата, на поделбите, на нетрпеливоста, на уцените и притисоците, вели Рената Дескоска, носител на листа на СДСМ и коалициските партнери во изборната единица 1.
На средбите со граѓаните претставувајќи ја програмата, Дескоска рече дека новата програма на СДСМ нуди решенија за подобар и достоинствен живот.
„Веднаш ќе ја воведеме евтината викенд тарифа, ќе обезбедиме 10.000 денари минимална плата, за младите во Скопје ќе изградиме Студентски град, ќе ставиме крај на драконските казни“, вели Дескоска.
„Македонија се наоѓа во значаен момент, момент во кој сите граѓани со своето учество на изборите треба да одлучат по кој пат ќе пролжи државата. На една страна е патот кој го одиме осум години: пат на сиромашни граѓани, пат на уценети граѓани, пат на притисоци и закани, пат на енормни казни, пат на криминал и корупција и блокирани институции. Социјалдемократскиот сојуз на Македонија е спремен да Ве поведе на патот на подобриот живот, патот на економски развој, патот на слободата и демократијата. Ние сме спремни за промени за нов почеток, ние сме спремни на нашите граѓани да им го вратиме достоинството, среќата и загубениот спокој. Тоа го можеме само заедно со Вас. Затоа, Ве повикувам сите, и оние кои гласавте на 13-ти и оние кои не излеговте да гласате, масовно да излеземе на избори на 27-ми април и да им кажеме не: на сиромаштијата, на поделбите, на нетрпеливоста, на уцените и притисоците. Ве повикувам заедно да се избориме за подобра иднина на Македонија!“ рече Дескоска.