Растот на просечната бруто плата во ТИР зоните во 2020 година споредено со претходната година изнесува 5,5, а нето износот пораснал за 2 проценти. Изминатата година иако во услови на пандемија компаниите во зоните забележале позитивни економски резултати и имале стабилен број на вработени, се вели во податоците добиени од спроведената анализа што денеска на прес – конференција ги соопшти директорот на ТИРЗ, Јован Деспотовски.
“И во услови на криза предизвикана од Ковид 19 бројот на вработени не само што останува стабилен, туку и континуирано расте. Дури 60% од компаниите имаат зголемен број на вработени. И покрај моменталниот број од над 14.000 наши сограѓани кои работат во зоните, пред нас стојат уште дополнителни 7500 работни места на кои се обврзани само постојните инвеститори, без оние со кои во моментов разговараме. Наша цел е со посебни мерки да го забрзаме овој процес и на нашите сограѓани да им овозможиме иднина дома, особено на младите,” вели Деспотовски.
Тој додава дека во моментов охрабрува фактот дека имаме позитивен тренд на раст. Тоа е забележано особено кај преработувачката индустрија каде платите во ТИРЗ во 2020 се за 10% повисоки од националниот просек за оваа дејност. Деспотовски најави и нова мерка за поттикнување на отворање нови работни места и повисоки плати.
– Целта е не со статистички вежби, туку со реални мерки платите да бидат над просечното државно ниво. Воведуваме нова мерка за поттик на отворање работни места со која нема да даваме средства само за отворање на работни места без критериуми, туку тие ќе бидат врзани со одреден процент на раст на платите на вработените во компанијата” најави Деспотовски.