Детали за големата акција на МВР во случајот „Мафија“

Министерството за внатрешни работи на Република Северна Македонија спроведе голема акција за разбивање на голема криминална група и приведување на лица вработени во МВР кои биле дел од истата која дејствувала на територијата на државата, а издавала патни исправи на странски лица со лажен идентитет.

Истрагата според информациите на надлежните институции започнала уште во февруари 2019 година и според информациите до сега откриено е дека македонски патни исправи со лажен идентитет биле издадени на 214 странски државјани и еден македонец.

Истрагата се одвивала во координација со Канцеларијата за истраги на американската амбасада и Интерпол а при денешната голема акција уапсени се девет осомничени лица вработени во МВР, а по едно полицијата трага.

Според информациите кои на прес-конференција посветена на денешната акција ги соопшти министерот за внатрешни работи Оливер Спасовски во групата која дејствувала во фалсификување на македонски патни исправи делувале овластени службени лица и контролори од управните органи на МВР.

„Таму каде што се движел патот на овој криминал, секој еден кој е вмешан ќе биде изведен пред лицето на правдата“, рече Спасовски. На граѓаните им порача да бидат мирни бидејќи институциите на системот работат  на случајот.

Министерот Спасовски обвини дека опозициската ВМРО – ДПМНЕ се обидела да изврши саботажа за истата и побара кривична одговорност од Мицкоски.

И опозицискиот лидер на ВМРО – ДПМНЕ упати обвинување до власта дека според него не може најбараните светски криминалци да добиваат пасоши во Македонија, а за тоа Заев и Спасовски да не знаат ништо.

Затоа како што посочи бара одговорност од владата за аферата Мафија.

Мицкоски вели дека оваа афера ќе биде една од првите кои ќе ја расветли неговата партија по промената на власта.

Според шефот на опозицијата партијата поседува информации за издадени повеќе од 200 пасоши на лица од балканското подземје.

Од владеачката СДСМ пак упатија прашање до Мицкоски дали  ја саботирал акцијата на МВР и дали има договор со криминалната група откако тој денеска соопшти дека информациите за афетрата до него ја доставил свиркач.