Талат Џафери, претседателот на Собранието кој вчера беше обвинет дека ја откажал седницата на Анкетна комисија за заштита на слободите и правата на граѓаните тврди дека тоа го направил не затоа што сакал некого да заштити, туку дека седницата не била свикана според Деловник.
Пратеникот Халил Снопче претходно обвини дека Џафери направил преседан затоа што на седницата требало да се разгледа информацијата за трагедијата со модуларната болница во Тетово и за автобуската несреќа во Бугарија, како и претставката на граѓанинот Мухаедин Беља, државен советник во Министерството на одбрана.
Џафери не му дозволил на претседателот на Анкетна комисија за заштита на слободите и правата на граѓанинот да одржи седница оти наводно таа била свикана спротивно на Уставот, Деловникот за работа на Собранието и Одлуката за формирање на работните тела каде се забранува собраниските комисии да преземаат истражни и судски постапки.
– Талат Џафери, како човек, пратеник или претседател на Собранието, ниту штити, ниту ќе штити некого за кого надлежните органи и институции ќе констатираат дека имаат одговорност за случувањата на тие два настани, вели Џафери.
С.М.