– Тенденцијата на опозицијата да прикаже дека тоа што се случува во Собрание е поради мојот инает, не е точна. Јас не се водам од инаетот, туку од процедурите и Деловникот. Каков инает, кога само за три закони се поднесени илјадници амандмани, а Комисијата за финансирање и буџет не закажа седница два месеци. Одлуката да бидат присутни пратениците заболени со коронавирус беше во консултации со сите инстиутции, се со цел да обезбедам функционално Собрание. Заболените пратеници немаа контакт со никого. Ако опозицијата поставува услови јас немам друго решение освен да го спроведам протоколот, вели претседателот на Собранието, Талат Џафери.
Според Џафери, со месеци стојат недовршени 20 седници на кои има многу закони кои не можат да се разгледуваат се додека не поминат на матичните комисии. Меѓу нив и 32. за која имаше осум продолженија, но и 36. на која беа антикризните мерки, за кои претходно имаше поднесено илјадници амандмани.
– Пратениците имаат право да дојдат и да гласаат во посебни услови утврдени со протокол, кој е донесен во јули 2020 година, кога јас бев во болница, изјави Џафери.
„Ни во воена состојба пратениците не се ограничени во движењето. Нивен личен став е дали ќе дојдат на седница. Јас не можам да му наредам на пратеник да не дојде на седница. Според „Протоколот за спроведување гласање за пратеници кои се наоѓаат во домашна изолација“, тие имаат право да дојдат и да гласаат во посебни услови утврдени со протоколот, кој е донесен во јули 2020 година, кога јас бев во болница.
Како дојде Арбен Зибери да гласа за избор на Владата? Па според истиот протокол кој се применува повеќе од осум месеци“, вели претседателот на Собранието.