Одѕивот на гласачите на претседателските избори до 13 часот и 40 минути, изнесува 25,79 отсто, соопшти Државната изборна комисија. До тој период на гласање излегле 415.670 граѓани. Најголема е излезноста во општина Новаци 50,3 отсто каде гласале 1.520 избирачи, односно во Битола 35 отсто, каде гласачкото право го оствариле 28.557 граѓани.
Над 30 отсто е и излезноста во скопските општини Кисела Вода (36,22), Аеродром (33, 46), Ѓорче Петров (31, 71), како и во Гевгелија (36,87) Велес (33,63), Охрид (31,81) Кавадарци (31,78) и Струмица (28,80). Најмал е одѕивот во Липково (3,76) Арачиново (4,48), Боговиње (4,56) Сарај (4,49). Во Струга излезноста е 11,02 отсто, а во Тетово, 11,61.
Споредено со претседателските избори во 2009 година, според ДИК, во истиот термин одѕивот на гласачите бил сличен со денешниот, односно тогаш изнесувал 26, 25 отсто.
МОСТ, според податоците добиени од ПВТ програмата – паралелно пребројување на гласовите, која претставува математичко-статистичка научна метода, соопшти дека одѕивот на гласачите до 13 часот е 25,31 отсто.
Оваа година бројот на избирачките места во земјата е зголемен за 504, во согласност со измените во Изборниот законик, според кои на едно гласачко место не смее да има повеќе од 1.000 избирачи. Поради ова дел од избирачите беа преместени во други гласачи места, што создаде и забуна кај гласачите, но и грешки во списоците на некои општинските изборни комисии, како што беше случајот во Велес. Таму утрото се појавила разлика од преку илјада гласачи во списоците на ДИК и на Општинската изборна комисија, но таа разлика подоцна била отстранета. Две политички партии веќе реагираа за овој случај.