Кандидатите за градоначалници на коалицијата „За подобра Македонија“ предводена од ВМРО-ДПМНЕ се во водство во Свети Николе, според 60 проценти од гласовите, во Старо Нагоричане, според 30 отсто од гласовите, во Центар со 6,6 отсто, во Штип со 31 отсто, покажуваат податоците на Државната изборна комисија.
Кандидатите на ВМРО-ДПМНЕ водат и во Берово, според 20 отсто од обработените гласови, во Битола со 21 процент, Валандово со 35 проценти, Василево со 71 процент, во Велес со 24 проценти од гласовите, Гевгелија со 51 процент, во Куманово со 19 отсто, јавува МИА.
Коалицијата Сојуз за иднината предводена од СДСМ, според податоците на ДИК, води во општина Дебарца, а води во Струмица каде се обработени 45 проценти од гласовите и во Богданци според 20 отсто од гласовите.
Кандидатот на ДУИ во Тетово Теута Арифи е во водство, според досега обработените 14 проценти од гласовите, а Невзат Бејта во Гостивар, каде се обработени 17 отсто од гласовите.
Заедничкиот кандидат на ВМРО-ДПМНЕ и на СДСМ во Струга Владимир Кочовски води со 55,85 отсто пред Зијадин Села од ДПА со 22,56 отсто и Арбен Лабеништа од ДУИ со 21,59 отсто, од вкупно обработени 34,62 отсто од гласовите што ги обработи Државната изборна комисија.
Слична е состојбата и во Општина Кичево, каде се обработени 39,62 отсто од гласовите, а убедливо води заедничкиот кандидат на ВМРО-ДПМНЕ и СДСМ Благоја Депостовски пред неговиот противкандидат Фатмир Дехари од ДУИ.