Со средба со федералниот министер за надворешни работи на Австрија, Александар Шаленберг, вицепремиерот за европски прашања Никола Димитров ја заокружи денешната еднодневна работна посета во оваа земја.
На средбата со Шаленберг тој истакнал дека прашањето за отпочнување на преговорите на земјата за полноправно членство во ЕУ има силни геополитички импликации за Унијата како проект за европско обединување, соопштуваат од македонското МНР.
Од таму додаваат дека Димитров укажал на загриженоста за негативното влијание на секое понатамошно одолговлекување на пристапните преговори врз кредибилитетот на ЕУ во регионот, а со тоа и на улогата на Унијата како глобален актер.
Министерот Шаленберг ја поздравил посветеноста на земјата во спроведување на реформите кои значат вистинско приближување кон европските стандарди и нагласил дека поддршката и интересот на Виена за заеднички успех е сосема јасна, велат од МНР.