Информацијата дека сум дала грант од 270.000 евра на фризерница е замајување на јавноста, минувам низ тродневната голгота поради објавувањето на сторијата за злоупотреба на европски пари, изјави директорката на Националната агенција за европски образовни програми и мобилност Лидија Димова на денешната пресконференција.
-Би сакала да кажам дека сметам дека тродневната голгота се должеше на тоа дека во јуни месец објавив сторија за злоупотреба на европски средства од 2.2 милиони евра и од овде започна цела голгота, а ова е случај од лани кој е пријавен уредно во Брисел и за ова прашањата треба да ги поставите кај Јавниот обвинител, изјави Димова.
Директорката потоа објасни дека не е даден грант на фризерница, туку на друго претпријатие, а истакна дека фотографиите на кои таа се наоѓа со Зоран Златковски се монтажа.
-Парите се делат по програма која ја утврдува Брисел, ние добиваме прирачник во кој се дадени сите правила како се оценуваат проектите и даваат парите. Станува збор за давање на грант точно, поточно на повеќе грантови, но не на фризерница, туку на претпријатието В.Е.З ТРЕЈД, а господинот Зоран Златковски е сопственик пред чија продавница се направија многу монтажи, а последната е дека јас со него се наоѓам пред неа. Дури и тоа да беше фризерница, во Еразмус програмата има простор за сите, во минатото сме давале такви грантови и тоа не е ништо спорно. Другата манипулација е дека директорката е таа која ги дава парите, а тоа тотално е неточно. Ние сме на еднакво ниво како и државите членки на ЕУ и ги применуваме нивните правила – додаде Димова.