Повторно разгорени страсти на пленарната седница на која се расправа за разрешување на јавниот обвинител Марко Зврлевски.
Откако по паузата, седницата продолжи со заседавање во 19 часот, пратениците на ВМРО ДПМНЕ веднаш побараа пауза од еден час, на што Талат Џафери остана индиферентен, за да по притисоците даде 10 минутна пауза.
По десетте минути пауза, Џафери соопшти дека некој од пратениците се дрзнал да му ја земе картичката и затоа тој го повикал собраниското обезбедување, кое стоеше од двете страни на говорницата.
Извори од собраниската служба велат дека пратеникот кој ја одземал картичката од Џафери бил пратеникот Илија Димовски.
Пратениците од ВМРО ДПМНЕ станаа од своите места и ја опкружија говорницата, меѓу нив најгласни беа Илија Димовски и Влатко Ѓорчев.
Набрзо тие се повлекоа на своите места, обезбедувањето ја напушти пленарната сала и седницата продолжи со заседавање.
Илија Димовски од собраниската говорница рече дека не сака да се предизвикуваат немили настани во собраниската сала, но дека и за љубов и за кавга се потребни двајца.