Најголемиот светски продуцент на документарни филмови за природата, британскиот BBC, ја претставува досега најреалната филмска приказна за праисториските џинови „Прошетка со Диносаурусите 3D“.
Прв пат во филмската историја кино-публиката ќе има можност да види како навистина изгледало кога диносаурусите владееле со земјата, благодарение на филмот „Прошетка со диносаурусите 3D“ кој во кината пристигнува на 19 декември.
„Прошетка со диносаурусите 3D“ е досега најамбициозниот филм за диносауруси, кој вистински ја прикажува одамна изумрената раса, праисториската ера во која живееле и нивното природно опкружување. Ова остварување од друга страна се базира на интересна приказна која публиката може лесно да ја разбере – приказна за настанувањето на семејството, семејства кои се распаѓаат, ривалство, натпреварување и неуморна борба за опстанок.
Дејството на филмот „Прошетка со диносаурусите 3D“ е сместено во периодот пред 70 милиони години на далечниот север на Алјаска. Секоја година долгите темни зими, тримесечните периоди со постојана темнина и безмилосните снежни бури протеруваат илјадници диносауруси на далечна миграција – на патот кон југот. На овој пат публиката тргнува со чудниот, но симпатичен диносаурус Пачи.
Од моментот на раѓањето Пачи морал да се бори против ривалски настроените браќа и сестри, дивиот и непредвидлив свет, како и застрашувачките грабливци. Откако еден од неговите браќа настрадува, Пачи со пријателите тргнува на патување на југ за да го пронајде своето семејство. Оваа мала екипа проаѓа низ многубројни авантури. Некои се забавни, а од некои се крева и косата на главата.
Пачи ќе го пронајде своето семејство, но тоа не е крај на неговите авантури. Созревајќи во зрел мажјак, тој ќе мора да се бори за своето место во заедницата додека не стане водач на крдото. Патот кој го оди Пачи покажува дека некогаш е поважно да бидеш прилагодлив и снаодлив отколку да бидеш најголем и најјак.
„Прошетка со диносаурусите 3D“ се базира на истоимената популарна ТВ серија која во 1999 година се прикажуваше на британската телевизија BBC. Продуцент е куќата BBC Earth, застапник на компанијата BBC Natural History Unit, најголемата светска продуцентска куќа кога станува збор за документарци за природата.