МНР на Русија упати остра протесна нота на холандската страна во врска со нападот на советникот во амбасадата во Холандија, пренесува Интерфакс, повикувајќи се на официјалниот претставник на МНР на Русија, Александар Лукашевич.
Како што претходно беше јавено, полицијата упаднала во станот на советникот на амбасадата на Русија во Хаг, Дмитриј Бородин, бидејќи наводно соседите пријавиле дека некој лошо се однесува кон децата во тој стан, а потоа го привела поради што руското министерство за надворешни работи испратило остар протест до Холандија.
Бородин за руските медиуми изјавил дека луѓе во полициски униформи влегле во неговиот стан во Хаг ноќта меѓу саботата и неделата и дека не се легитимирале. Полицајците кажале дека соседите наводно пријавиле дека некој лошо се однесувал со децата во станот на Бородин.
„Ова е тешко кршење на Виенската конвенција“, изјавил претседателот на Русија Владимир Путин, кој побарал од Холандија да се извини поради тоа што во Хаг руски дипломат од руската амбасада бил приведен на испрашување.
„Чекаме објаснување и извинување, како и казнување на одговорните“, ја пренесува изјавата на Путин агенцијата РИА Новости.