Дипломатскиот кор го осуди насилството врз ЛГБТ центарот
Амбасадорите во земјава со поддршка на ЛГБТ заедницата- а преку посетата на Центарот во скопската чаршија и јавно го осудија насилството врз нив и ги повикаа институциите да го расветлат инцидентот во кој група маскирани лица го нападнаа Центарот и повредија полицаец.
Евроамабасадорот Аиво Орав вели дека политиката на ЕУ е многу јасна во однос на дискриминацијата и порача Владата да обезбеди еднаков третман против сите видови дискриминација.
„Ние многу жалиме за тоа што се случи во минатата недела. Нападот беше многу сериозен и убеден сум дека во истрагата која е во тек ќе бидат најдени сторителите и со нив ќе се постапува согласно законот“, вели Орав.
На повиците на Орав им се придружи и холандската амбасадорка Мариет Схурман. Таа вели дека насилството против мировните организации не смее да помине неказнето.
„Многу е важно често да се потенцира проблемот. Знаеме дека истрагата е во тек и ги видовме снимките од камерите и искрено се надеваме дека сторителите ќе бидат казнети за делото. Да се зголеми толеранцијата меѓу луѓето кои се различни е само збогатување на општеството и затоа многу го поддржуваме центарот и затоа е важно тој да остане тука“, вели Схурман.
Претседателката на Хелсиншкиот Комитет Уранија Пировска се пожали дека досега насилството ниту било осудено од инстиуциите, ниту биле преземени мерки за пронаоѓање на сторителите. Тие веќе доставиле преставка во Секторот за внатрешна контрола во врска со постапувањето на полицијата за време на нападот, а велат дека доколку МВР не постапи по законите тие ќе ги објават снимките од нападот на кои јасно се гледало како полицијата постапувала при нападот на ЛГБТ центарот.
Покрај Орав и Схурман, на средбата во ЛГБТ центарот присуствуваа и Заменик амбасадорот на Соединетите Американски Држави, претставници од Германската и Шведската амбасада, како и претставник од ОБСЕ.