За НОВА од Сараево, Емица Ниами-Налбантиќ
Гори зградата на Владата на Кантонот Сараево и во тек е евакуација на вработените, а на улиците на Сараево владее хаос. Искршени и ограбени се трафиките кај Претседателството на БиХ, горат службени возила, демонстрантите се во судир со полицијата, а употребен е и солзавец од страна на полицајците.
Новинарката Емица Ниами, за НОВА, директно од Босна и Херцеговина вели од сите страни се слушаат сирени на екипите за брза помош и пожарникарите кои се обидуваат да го изгаснат огнот.
– Полицијата постојано апелира до граѓаните да го смират насилството но точката на вриење е веќе постигната, вели Ниами потенцирајќи дека се очекува за време на претстојниот викенд ситуацијата да се смири, но дека од понеделник најавено е дека демонстрантите ќе продолжат со своите барања.
Воедно, како што известуваат босанските медиуми, демонстрантите континуирано фрлаат камења и пиротехнички средства и извикуваат „Лопови“ и „Оставка“.
Според босанските медиуми до сега има најмалку 29 повредени лица, како и новинари и фоторепортери.
Протести се одржуваат и во Бихаќ, Јајце, Високи, Брчко.
Протестите на граѓаните кои почнаа пред дена во Тузла се проширија низ повеќе од 20 градови во знак на поддршка на обесправените работници од Тузланскиот кантон, но и како израз на општото незадоволство од моменталната ситуација во земјата.