Решението за именување на Бени Шаќири за директор на МКЦ е потпишано од Данела Арсовска на 10 јануари, без да биде известен Управниот одбор на институцијата и другите противкандидати, дознава НоваТВ. Со ова е направен превид и е оневозможено правото на жалба во рок од 8 дена, додека Шаќири денеска седна на директорската фотеља.
Иако денеска се бележи точно една година откако десетици граѓани, културни работници протестираа пред Младинскиот културен центар против политички и партиски позиционирања во оваа институција со паролата „МКЦ (не) е партиска цицка“, сепак волјата на Арсовска и нејзиниот фаворит за позицијата директор е исполнета.
На последниот конкурс за избор на директор во МКЦ стигнале три пријави: музичарот Бени Шаќири, дипломиран продуцент и филмски работник Никола Мадиќ, кој е сопруг на заменичката-министер за правда Викторија Аврамовска-Мадиќ, и Владимир Стојчевски, дипломиран продуцент и професор, магистер по менаџмент на јавни установи.
Според процедурата, Управниот одбор на МКЦ ги доставил апликациите од кандидатите до градоначалникот на Град Скопје, со тоа што предлага кандидати кои според критериумите се соодветни за позицијата за која аплицираат. Условите, покрај високото образование во областа на хуманистичките науки, се и 5-годишно работно искуство во областа на културата.
Досега в. д. директор на МКЦ беше Никола Алексов, дипломиран детектив, кој беше поставен на функцијата во јануари откако Арсовска го разреши Ванчо Богоев.
А. Василевска