Собранието ги избра Фатмир Бесими за министер без ресор кој ќе биде задолжен за евроинтеграциите, Талат Џафери за нов министер за одбрана и Тахир Хани за локална самоуправа.
За Џафери гласаа 65, а за Бесими и за Хани 64 пратеници.
Промената во владиниот кабинет следи откако вицепремиерката за евроинтеграции Теута Арифи и министерот за локална самоуправа Невзат Бејта, поднесоа оставки на нивнита функции по нивната кандидатура за градоначалници на претстојните локални избори.
Најголеми негодувања во јавноста, покрај најголемиот број на гласови од пратениците, предизвика назначувањето на досегашниот координатор на пратеничката група на ДУИ, Талат Џафери.
Апелот од „Достоинство“ до пратениците беше дека не треба да го дадат својот глас за поранешен командант на ОНА, кој не смее да биде македонски министер за одбрана.
Претседателот на Владата на Република Македонија, Груевски, на денешната седница врз основа на неговите ингеренции, како што рече, ги предложи тројцата нови министри и очекува тие успешно да ја спроведуваат владината програма.