По смртта на израелските војници убиени во Газа во саботата, американскиот државен секретар Џон Кери бил во студиото на Fox News на најавено интервју. Во очекување на стартот на емисијата, тој разговарал со неговиот соработник и не забележал дека микрофонот е уклучен. Неговите забелешки на сметка на Израел биле снимени.
Зборувајќи за борбите во саботата кога загинаа тројца израелски војници но и десетици палестински цивилни жртви помеѓу кои и многу деца, Кери рекол: «Се надевам дека ова нема да биде еден вид покана за да се стори повеќе! Добро би било ова да го сфатат како предупредување». Кери потоа рекол дека операцијата на Израел била лоша со оглед на бројот на цивилните жртви во израелската операција кои ги има околу 500 од почетокот на борбите од 8 јули.
«Треба да одиме», му вели Кери на својот соработник. «Верувам дека треба да одиме вечерва. Лудило е да се остане овде и ништо да не се прави. Ајде да одиме.»
Новинарот на Фокс побарал од Кери да ги објасни овие зборови. Знаејќи дека овој пат е сниман, Кери го евоцирал правото на Израел да се брани: «Мислам дека е тешко, многу тешко во вакви ситуации, тоа е, јасно, многу тешко….. Го поддржува правото на Израел да се брани против истрелите кои продолжуваат. Хамас почна да пука откако Израел се обиде да ги најде тие кои ги убиле тројцата млади – знаете, имаше едно момче кое беше и Американец, тројца млади граѓани на Израел. Тоа е срамно”, му рекол Кери на новинарот. И продолжил: “Тешки се тие видови операции. Се разбира реагирав на начин… на кој се реагира со почит кон децата и цивилите. Но, војната е сурова, тоа веќе јавно сум го кажал и еве го повторувам. Го браниме правото на Израел да прави она што прави за да ги нападне тие тунели”, вели тој.
На крајот Кери побарал од Хамас да биде разумен и да разбере дека треба да се прифати прекинот на огнот со што ќе спаси животи.