Тешката економска криза во Грција ги прави несериозни очекувањата дека земјата може да се фокусира на решавање на билатералните спорови, како што е тој за името на Македонија, смета Едвард Џозеф, поранешен директор на Меѓународната кризна група за Балканот, по посетата на грчкиот премиер Андонис Самарас на Вашингтон.
– Целосна будалаштина се изјавите на Самарас дека Грција сега е остров на стабилност. Точно е дека спроведоа реформи, но со Грција се уште најважна е нивната внатрешна ситуација, која е многу сериозна. Долговите не се само бројки на парче хартија. Тешко ми е да го кажам ова, но другите прашања, како спорот за името, бледнеат во споредба со проблемите на Грција.
– Замислете само Грција да се распадне. Имаат фашистичка партија, Златна зора, потоа имаат министер за администрација, Мицотакис, кој се обидува целосно да ја видоизмени нивната јавна администрација отпуштајќи толку многу луѓе, и притоа се уште се длабоко во долг.
– Доколку нема нова помош по изборите во Германија, Грците се соочуваат со финансиска криза, која се заканува на економијата на целиот свет, вели Џозеф, кој сега работи на универзитетот „Џонс Хопкинс“ во Вашингтон.