Во организација на Асоцијацијата за истражување, комуникации и развој „Паблик“ денеска ќе им бидат доделени сертификати на првата група социјални ментори (ментори за работна интеграција) од Републикава, кои треба да бидат партнери на компаниите и на институциите, во процесот на интеграција на ранливите лица на пазарот на трудот.
Низ верификуваната програма поминале 12 социјални ментори, кои освен со теоретски дел, знаењата ги заокружиле и со практичен дел и генерирале резултати кои, како што велат организаторите, значат позитивна промена во животите на тешковработливите лица.
Социјалните ментори, нагласуваат, се алката што го прави спојот меѓу социјалната заштита и пазарот на труд. Тие ги поттикнуваат афинитетите кај потешковработливите лица, овозможуваат наградување на нивните капацитети и го трасираат нивниот пат кон пазарот на труд градејќи релации со бизнис секторот.
-Улогата на социјалните ментори е да бидат партнери на компаниите и на институциите, во процесот на интеграција на ранливите лица на пазарот на трудот. Но, пред сѐ, тие се партнер на менторираните лица кои имаат потреба од поддршка при работна интеграција. Нивна главна интенција е да охрабрат, поттикнат, насочат, придвижат, променат. Да бидат мост помеѓу замислата за промена и вистинската промена. И сето тоа со една цел – создавање повеќе инклузивни работни места кои се од огромно значење за креирањето одржливи општества со еднакви можности за сите, се вели во соопштението по повод доделувањето на сертификатите.
Креатор на методологијата и на едукативната програма за социјално менторство е Асоцијацијата за истражување, комуникации и развој, „Паблик“, која преку „Регионалното унапредување на социјалното менторство како пристап за активирање на пазарот на трудот за ранливите лица“ во соработка со Германското друштво за интернационална соработка (ГИЗ) внесува промени во системите на социјална заштита во Македонија и во Западниот Балкан.