Во неделата што остана зад нас главна тема беа Турција и евро турскиот договор за бегалците. И поделбата помеѓу земјите членки поради овој договор креиран од Ангела Меркел: едни, како Франција и Шпанија, го поддржаа договорот а други, како источните земји, му свртеа грб.
Но, видовме исто така како старите верни непријатели станаа први другари. Веднаш по европскиот самит, во Измир се сретнаа Алексис Ципрас и Ахмет Давутоглу и се договорија да ја зајакнат борбата против шверцерите во Егејското Море.
– За време на самитот во Брисел и овде во Измир Грција и Турција дадоа заеднички одговор и заедничка перспектива за сите оние во Европа кои сметаат дека Грција и Турција треба сами да ја менаџираат оваа криза. Грција и Турција ова го работат со заедничка перспектива, изјави шефот на турската влада Давутоглу.
Борбата против оние кои нелегално се збогатуваат врз грбот на бегалците е добра работа. Но она што предизвикува нервоза и загриженост е токму евро-турскиот договор.
Дури и турската опозиција се јави велејќи дека овој договор на ништо не личи и со него Турција ќе се претвори во тампон зона.
– Унијата да си ги земе шесте милијарди евра и самата да се погрижи за бегалците, рече главната опозициска партија.
Во однос на бегалците договорот е срамен, рече Амнести Интернешнел а реагираа и Обединетите Нации. За нив договорот не е легален.
И тоа не е се. Европските пратеници се прашуваат зошто се попушта пред турските уцени, како да се даде безвизен режим и ветување за членство на земја која затвора медиуми, која го зароби судството и на која човековите права и се последна грижа.
Мигранитите кои се во Европа претставуваат 0.25 отсто од европското население а тоа е 100 пати помалку од бројот на бегалците во Либан, се побунија многу пратеници.
И додека ние очекуваме реакција за настаните во Уставниот суд од нашиот претседател, тој се јави од Германија со интервју за гермаскиот Билд. Читајќи ги неговото интервју многумина се прашаа дали тој не е љубоморен милионите што Грција ги доби за бегалците. И што ли мисли за милијардите на Турција?