Македонија бележи фамозни резултати во извештајот Doing Business на Светската банка и се вредува во најдобрите економии во Европа. Толку фамозни што Косово и Русија одлучиле да вработат македонски експерти кои ќе им помогнат да го подобрат имиџот на нивните земји!
Се разбира, ова е шега на Европската иницијатива за стабилност (ЕСИ) која објави анализа за извештаите и топ листите на оваа респектабилна финансиска институција.
ЕСИ одлучи од поблиску да ги погледне бројките на Doing Business и да провери дали Македонија и други земји како Грузија или Белорусија навистина се толку многу успешни, поуспешни од многу други европски економии и во овој случај Германија и Швајцарија.
Резултатот на анализата е поразителен за кредибилитетот на Doing Business.
Така, според овој извештај за 2013 година Македонија е на 25 место во светот додека Швајцарија се рангира на 29 место. Грузија е на 8 место а Германија на 21 место. ЕСИ реши да одговори на прашањето како е можно Грузија да има подобра бизнис клима од Германија и тоа во текот на повеќе години и како Македонија успева да биде подобра од Швајцарија?
Според ЕСИ, ранграњето на Doing Business се состои од 10 различни индикатори и земјите добиваат оценка за секој од овие индикатори. Така, Грузија и Македонија имаат високи места во само неколку индикатори: двете земји добиваа висока оценка за добивање кредит и старт на бизнис, Грузија е одлична за начинот на кој се регистрира имот а Македонија за заштитата на инвеститорите.
Според ЕСИ, Doing Business порачува дека квалитетот на бизнисот и неговата регулатива во Македонија можат да се споредат со Швајцарија благодарение само на десет индикатори е проблематична теорија. «Во погрешна насока води сугестијата дека бизнис климата може да зависи од бројот на деновите за да се регистрира продавница или кафетерија», вели ЕСИ.
Анализата на Doing Business не зема во предвид многу други есенцијални фактори за да се инвестира во една земја како на пример безбедноста, големината на пазарот, макроекономската стабилност, состојбата на финансискиот систем и обуката на работната сила.
Doing Business според ЕСИ може да направи штета бидејќи сугерира дека клучните проблеми во земја како Македонија лесно се идентификуваат и можат да се решат без вистинско разбирање на локалните компаративни предности и маани на постоечките бизниси или индустриското наследство.
Наскoро на НОВА ќе може да го прочитате интегралниот текст од анализата на Европската инцијатива за стабилност.