Доколку за месец и половина граѓаните не се корегираат во своето однесување и сериозно не пристапат кон почитување на мерките од надлежните институции, во февруари не очекува нов бран на Ковид-19, предупредуваат македонските епидемиолози. Според нив дневните бројки на новозаразени со коронавирус во Македонија од пред десетина дена повторно почнаа благо да растат, а се намалува и интересот за вакцинација.
– Не сум оптимист со оглед на тоа како сите колективно се однесуваме. Не носат маски, не сакаат да се вакцинираат, а повторно проблем се собиранките на младите во затворените кафулиња и ресторани. Што ако повозрасните лица седат дома, кога малдите шетаат и не внимаваат на мерките и вирусот го носат дома, истакна епидемиологот Сашко Олумчев.
Тој потенцира дека на удар на во моментов се младите, а причина за сè поголемиот број заразени меѓу оваа популација е ниската стапка на вакцинација.
– Се поголем е бројот на новозаразени средношколци и основци кои не ги почитуваат мерките и одбиваат да се вакцинираат. Колку и да одбиваат, сепак мора да разберат дека вакцинацијата и носењето маски е единствениот начин да се заштитиме и ставиме карј на епидемијата, додава Олумчев.
Евидентен е резултатот од вакцините, но интересот за третата доза во моментов на вакцина е голем, а стагнира бројот на оние кои треба да ја примат првата доза на вакцина. Затоа, како што потенцира Олумчев, треба да се интензивираат напорите да се едуцираат граѓаните за тоа кои се бенефитите, ефикасноста и безбедноста на вакцините.
Истражувањата покажуваат дека ефикасноста на вакцините се намалува шест месеци по примањето на втората доза, па многу земји воведоа вакцинирање со трета доза како засилувач на имунитетот, најмалку шест месеци по примањето на втората.
Владата пред некој месец воведе задолжителен вакцинален сертификат за влез и излез од земјава и за влез во угостителски објекти и затворени трговски центри, а пред неколку дена ги укина ограничувањата за максимално дозволен број на гости на една маса во кафеаните, како и за дозволениот број гости во објектите.
Од почетокот на пандемијата пред година и половина досега во Македонија се регистрирани над 200 илјади случаи на коронавирус, што значи дека секој десетти човек ја прележал болеста. Над 7 илјади луѓе починаа од вирусот, а во моментов има над 6 илјади заболени.
И.Р.