Од април оние домаќинства кои го исклучија парното греење повеќе нема да плаќаат фиксен надоместок, предвидуваат новите предлог – правила за снабдување со топлинска енергија што денеска на седница ги разгледа Регулаторната комисија за енергетика.
Се проценува дека во Скопје има околу 20.000 домаќинства кои го исклучија парното во своите домови, а со години плаќаа паушал, кој изнесуваше десет денари за еден квадратен метар месечно, во текот на целата година.
Регулаторната комисија за енергетика исто така одлучи домаќинствата кои ќе сакаат во иднина да го исклучат парното, да имаат обврска да изработат елаборат со кој ќе докажат дека новиот начин на кој ќе се греат нема да предизвика проблеми во снабдувањето на електрична енергија.
„Доколку има несоодветен начин на греење и парното греење се замени со греење на електрична енергија кое има висока потрошувачка, може да настанат проблеми во снабдувањето со електрична еерргија. Од тие причини секое домаќинство кое има право да се исклучи треба да докаже дека новиот начин на грење ќе биде енергетски поефикасно од тоа што досега го имал преку системот за топлинска енергија“, кажа Марко Бислимовски, претседател на РКЕ.
Потрошувачите кои ќе сакаат да се исклучат ќе треба да побараат и дозвола од 50 проценти плус еден граѓанин од станарите кои живеат во зградата.