Во Друштвото на писателите на Македонија денеска напладне ќе биде промовирана книгата „Сите драми и сонети” од Вилијам Шекспир. Препевот од англиски е на Драги Михајловски, писател, преведувач и универзитетски професор.
Книгата, во обем од 1650 страници, ја објави издавачката куќа „Каприкорнус” од Скопје, а за овој подвиг на истакнатиот македонски писател, преведувач и универзитетски професор, на промоцијата во ДПМ ќе зборува Венко Андоновски. Делови од творештвото на Шекспир ќе чита Роберт Велјановски, а програмата ќе ја води Александра Велинова.
Со книгата „Сите драми и сонети” најголемиот писател на англискиот јазик и најеминентниот светски драмски автор Вилијам Шекспир на македонските читатели им се претставува во интегрален вид со 37 драми и 154 сонети. Покрај предговорот за творечките особеноси на Шекспир, книгата располага со посебни текстови за секоја драма, како и со прилог за сонетите. Автор на сите текстови е препејувачот проф. д-р Драги Михајловски.