Управата за јавни приходи во првите 3 месеци од годинава собра 24 отсто помалку пари од ДДВ, споредено со истиот квартал лани. Додека лани се собрани 159, 3 милиони евра, годинава тој износ е помал за цели 38,3 милиони евра.
Од друга страна, пак, раст бележат персоналниот данок на доход и данокот на добивка, од кој се собрани 67,5 отсто повеќе пари. Сепак, и покрај зголемениот износ на собрани пари од овие даноци, сумите кај овие ставки се далеку помали од оние кај ДДВ-то. Така, на пример, иако од данокот на добивка се собрани дури 67,5 отсто повеќе пари, тој зголемување е само 10,6 милиони евра.
Лани, собраниот износ и од данокот на добивка падна за 6 отсто, односно за 3,6 милиони евра, додека падот кај ДДВ-то изнесуваше 8,9 отсто или за 61 милион евра од вкупниот износ од 625,5 милиони евра.
Деловниот сервис „Бизнис Плус“ извести дека државата во изминатите 15 години, пак, има собрано вкупно 23 милијарди евра, но само 2,3 милијарди завршиле за изградба на патишта, железници, енергетски објекти и училишта. Најголем дел од парите завршил во државните фондови за исплата на пензии, здравствена зашштита и други тековни трошоци.
Само за споредба, јавува сервисот, за плати се потрошени 4,6 милијарди евра, а за набавка на стоки и услуги за потребите на сите досегашни влади и министерства од државната благајна се потрошени 2,7 милијарди евра.