Две трансплантации на бубрези од починат донор се вршат утрово на Клиниката за урологија, објави на официјалниот профил на Фејсбук, министерот за здравство, Венко Филипче.
„По направената експлантација на органите која заврши во доцните ноќни часови. Благодарение на хуманоста на семејството на донорот и нивната одлука да се донираат органите, двајца пациенти на дијализа добија шанса за нов живот. Ова храбро семејство уште еднаш ни покажа дека е возможно живот да се подари. Дека можеме да веруваме во чуда и некој да добие втора шанса за живот.“, пиша тој.
Министерот упати благодарност до семејството и до сите лекарски тимови кои се вклучени во оваа трансплантација, а на пациентите им посака брзо закрепнување по операциите.
Ова е четврта по ред трансплантација од месец април до сега. Само во 2021 година се направени три трансплантации на срце и осум трансплантации на бубрези од починат донор.