Дводневната конференција посветена на темата „Врската меѓу добросостојбата на децата и нивните постигнувања“, ќе се одржи денеска и утре во Скопје, како заедничка иницијатива на Владата на Република Северна Македонија, Британската амбасада во Скопје и УНИЦЕФ.
На отворањето на конференцијата, како што е најавено, ќе се обратат премиерот Димитар Ковачевски, амбасадорката на Обединетото Кралство Рејчел Галовеј и претставничката на УНИЦЕФ Патриција ДиЏовани.
На конференцијата ќе учествуваат експерти за образование од регионот и пошироко за да споделат искуства и податоци за најновите сознанија во областа на социо-емоционалното учење во раното детство и растечката важност на технологијата и дигиталните вештини и како тие се поврзани со целокупната добросостојба на учениците и менталното здравје.
Министерката за труд и социјална политика Јованка Тренчевска денеска ќе го отвори првиот и вториот блок дискусии во кои ќе се зборува за значењето на предучилишното образование, потребата од холистичкиот развој во детството и растечката важност на социо-емоционалното учење во раното детство.
Министерот за образование и наука Јетон Шаќири, како што е најавено, утре ќе ги отвори третиот и четвртиот блок дискусии за тоа како образовниот систем да поттикнува иновација, конкурентност и напредок, а во исто време да негува солидарност, добросостојба и холистички развој.