Еди Рама нов премиер на Албанија
Коалицијата за европска Албанија, која ја преводи Социјалистичката партија на Еди Рама, од вкупно 80 отсто од избројаните гласачки места во 12 изборни региони во земјата, има освоено засега 84 мандати, додека Коалицијата за вработување, благосостојба и интеграции, предводена од Демократската партија на Сали Бериша, има 53 мандати, јави дописникот на Утрински весник од Тирана.
Засега мандати во албанскиот парламент освоија и две партии кои се надвор од коалициите – партијата Нов демократски дух на експретседателот Бамир Топи и партијата ,Црно-црвена алијанса на Крешник Спахиу.
Еди Рама, изјави дека очекувал победа и ротација на власта, но додаде дека победата е многу повисока од онаа што се очекуваше.
Слична беше и изјавата на коалицискиот партнер на социјалистите, експремиерот Илир Мета, лидер на партијата Движење за социјалистичка интеграција. Неговата партија според досегашните податоци има освоено над 15 пратеници, што е голем успех на оваа релативно нова партија.
Освоените мандати на партијата на Мета и на Рама заедно надминуваат 84 пратенички места, што значи и доминација во новиот состав на Собранието. Албанскиот парламент има 140 места, а досегашната опозиција сега обезбеди двотретинско и можност лесно да донесуваат значајни одлуки.
Поразот на десницата се оценува како реакција на народот во врска со многубројните афери на корупција и проблемите во судството кое имаше многу слаба доверба во јавноста.
ОБСЕ-ОДИХР, како и претставници на ЕУ и на САД оценуваат дека ако се исклучи тешкиот инцидент во Лач кога дојде и до убиство и ранување, како и многубројните проблеми од технички план, изборниот процес бележи напредок во Албанија.