Една зделка на скопски „Гранит“ во Босна и Херцеговина, која се однесува на изградба на автопат во Република Српска, ја крена вредноста на вкупните договорени градежни работи на сите македонски компании во странство во првиот квартал годинава над 27 пати споредено со истиот период лани.
Ако лани во првите три месеци износот на договорените градежни работи во странство изнесуваше 2,9 милиони евра, тие годинава изнесуваа 78,6 милиони евра. Од оваа сума, 72 милиони евра се однесуваат на договорени градежни работи во Босна и Херцеговина.
Во БиХ во моментов работи единствено скопски „Гранит“ и тоа на изградба на автопатот Бања Лука-Добој. Изградбата на овој автопат е поделена на две делници: од Прњавор до Добој и од Прњавор до Бања Лука.
Тендерот за изградба на делницата Прњавор-Добој со должина од 36 километри беше добиен лани и неговата вредност изнесуваше 180 милиони евра. Годинава, пак, „Гранит“, кој во БиХ работи партнерски со тамошната компанија „Интеграл инженеринг“ од Лакташи, го доби и тендерот за изградба на делницата од Прњавор до Бања Лука, доставувајќи најниска понуда од 158 милиони евра во конкуренција на уште пет компании од Кина, Турција, Чешка, Австрија и Грција.
Инаку, лани во првиот квартал македонските градежници ниту договориле, ниту извршиле градежни работи во БиХ.