Едвард Кукан, словачки пратеник од Европската народна партија, најголемата политичка група во Европскиот парламент на која и припаѓа и ВМРО-ДПМНЕ, одлучи да го наруши молкот на своите сопартијци за последните настани во Македонија.
Преку кусо соопштение Кукан ја изразува сета своја загриженост за настаните во нашата земја:
“Напнатите односи помеѓу владеачката партија и опозицијата добија ново свртување кон полошо кога лидерот на опозицијата Зоран Заев беше обвинет дека го нарушува уставниот поредок”, вели Кукан кој е одличен познавач на Балканот и кој од блиску ја следи политичката ситуација.
Пратеникот побара од ВМРО-ДПМНЕ, кој и е партнер на Европската народна партија, да “ги почитува демократските принципи како што е јасната разделеност помеѓу партијата и државата и независноста на судството кои треба на транспарентен начин да превземат политички сензитивна истрага”.
Нашите извори во Европскиот парламент во Брисел се надеваат дека наскоро целата политичка демохристијанска група ќе одлучи да го соопшти објективно својот став за настаните во Македонија и покрај тоа што владеачката партија во Македонија е нивни партнер.