Портпаролката на Европската Комисија задолжена за проширувањето, Ана Писонеро, вели дека Брисел „ги охрабрува и Бугарија и Северна Македонија да изнајдат заеднички прифатливо решение за тековните билатерални прашања.
-Со нетрпение очекуваме да се одржи првата Меѓувладина конференција што е можно поскоро, додаде Писонеро во изјава за МИА.
Од Европската Комисија за МИА не сакаат да влегуваат во детали околу политичката ситуација во Бугарија после изборите што се одржаа во неделата, но се надеваат дека Скопје и Софија ќе постигнат компромис.
Северна Македонија е блокирана во Советот на ЕУ за усвојувањето на преговарачката рамка и одржување на првата Меѓувладина конференција со ЕУ поради неразрешениот спор со Бугарија.
Дипломатите во Брисел како и политичарите во Северна Македонија сметаа дека по изборите би можело да има поместување во позициите меѓу двете земји во насока на изнаоѓање компромисно решение, но од Софија пристигнуваат изјави дека изборите ништо не менуваат во ставот на Бугарија по однос на ова прашање.
Минатата година Северна Македонија, но и целиот регион, се најдоа блокирани во Советот на ЕУ поради неможноста да се постигне компромис за вокабуларот во редовните декемвриски заклучоци на ЕУ за проширувањето, пред сѐ во однос на една реченица поврзана за „погрешното толкување на историјата”.
Северна Македонија во мај треба да го одржи и редовниот состанок за Стабилизација и асоцијација, кој требаше да се одржи во февруари, но беше одложен, во голем дел поради тоа што немаше напредок во разговорите со Софија. Според нацрт агендата Советот за стабилизација и асоцијација е закажан за 12 мај, со него би требало да претседава премиерот Зоран Заев од македонска страна, иако за сега оваа информација не е потврдена официјално.
Државниот врв во Северна Македонија нагласи дека сѐ уште се надева дека првата Меѓувладина конференција би можела да се закаже пред крајот на португалското претседателство, односно пред први јули.