Усвојувањето на уставните измени во момент кога опозицијата го бојкотира Собрание не е најдобрата идеја на владината коалција. Вака накусо може да се синтетизира реакцијата која до Македонија и пред утрешното гласање на уставните измени ја испраќа Европската комисија (ЕК) преку својот портпарол Маја Коцијанчиќ.
“Венецијанската комисија и Европската комисија повеќе пати повторија дека е многу значајно вакви важни уставни промени од ваква природа да бидат усвоени со најширок можен политички и општествен консензус”, вели ЕК која, деновиве подготвува повеќе посети на нејзини функционери во Македонија. Најавени се доаѓањата на двајца високи функционери од Генераланата дирекција за проширување а по нив, најверојатно на 19 и 20 февруари, во прва посета на Македонија треба да пристигне и новиот комесар за проширување Јоханс Хан.
ЕК потврдува дека се одржал процес на консултации за уставните измени заедно со меѓународни тела. Но, ЕК го нотира фактот што гласањето се најавува во момент кога опозицијата го бојкотира Собранието. “Сепак е многу важно уставните измени да бидат резултат на широка и суштинска дебата во која треба да учествуваат различните политички сили”, вели ЕК.
“Што се однесува до содржината, Венецијанската комисија издаде мислење во кое беше подвлечени темите од гледна точка на Европската конвенција за човекови права. ЕК ги оценува уставните или други измени на законите од перспектива на нивна компатибилност со законите и политиките на ЕУ”, понатаму забележува ЕК.
Бриселската администрација вели дека од тие причини е загрижена и таа загриженост и е пренесена на македонската влада. Европските функционери пренеле во Скопје дека “секоја измена треба да води сметка од придобивките на ЕУ и меѓународните правила вклучително финансиските услуги, даночната транспарентност, компетитивноста, борбата против перењето пари и прикривањето на даноци. Нацртот на уставните амандамни треба оттука да се оценува преку целото законодавство, особено со акцент на продложените амандмани за финансиските зони”.
Рената Дескоска од СДСМ предупреди уште во октомври дека најсериозните забелешки се однесуваат на воведувањето т.н. меѓународна финансиска зона а со ваквиот уставен амандман „постои потенцијален ризик дека зоната ќе стане рај за „нечисти пари”.
“Комисијата практично предупредува дека Македонија е на пат да стане пералница на пари, дека како што вели и експертската јавност, оваа зона ќе стане „држава во држава“, рече Дескоска додавјќи дека овој уставен амандман го загрозува единството на државата и ги лишува граѓаните на Македонија од суверенитетот над дел од нејзината територија.
Најавата за уставните измени предизвика критики од повеќе земји и организации затоа што предложениот уставен амандман XXXIII ги забранува истополовите бракови, како и воведување граѓанските заедници или било која друга форма на животно партнерство за истополовите партнери.