Вонредно мерење на фугитивната прашина од страна на акредитирана лабораторија за мерење на амбиенталниот воздух, но и хемиска анализа на честичките побара од Макстил Државниот инспекторат за животна средина. Министерството за животна средина попушти под притисокот на граѓаните кои се жалат дека во последните денови Макстил испушта енормно густ чад кој има карактеристичен и неподнослив мирис.
Со ова Макстил се задолжува покрај мерење и контрола на ПМ 10 честичките или т.н суспендирани честички, да се направи и хемиска анализа на нивниот составот.
-Доколку се утврди дека причинител за испуштање на емисиите над дозволената граница е Макстил ќе се постапи согласно казнените одредби пропишани во законот за животна средина и тоа од 70.000 до 100.000 евра во денарска противредност за правното лице и 8.000 до 13.000 евра за одговорното лице, соопштуваат од Министерството за животна средина.
Жителите на населбата постојано се жалат дека фабриката испушта големо количесто чад и прашина поради што не можат да ги отворат прозорците, а на многу од нив им е нарушено здравјето. Но, во последните денови граѓаните се особено загрижени бидејќи во воздухот се чувствува мирис на хемиска материја.
Од Министерството соопштуваат дека добиле известување од Макстил дека денес и во наредниот период нема да работат поради дефект на Електролачната печка.
Макстил има рок до 30 октомври да стави филтри за заштита од опасните честички, откако Владата неколку дена пред истекот на рокот во април, го пролонгираше рокот на компанијата. Останатите гиганти, како и помалите фабрики обезбедија филтри за заштита на воздухот.
Светката банка во својот последен извештај оцени дека загадувањето на воздухот во Македонија е едно од најголемите во Европа,а загадувањето на воздухот со години е над европските стандарди.
Земјава е на прво место на листата на банката, кога станува збор за изложеност на граѓаните на загаденост на воздухот со цврсти честички. Веднаш зад нас е Србија, а потоа следуваат Романија, Бугарија и Малта.
.jpg)
Но, дополнително во извештајот е наведено дека Македонија е на петто место според годишните смртни случаи предизвикани од загаден воздух односно од ПМ10 честичките.
Истражувањата на Светска банка укажуваат на тоа дека цврстите честички се одговорни за повеќе од 1.350 смртни случаи годишно, но и илјадиници изгубени работни денови – што претставува економски трошок од 253 милиони евра годишно или 3,2% од БДП.
„Прераната смртност се појавува од кардиопулмонарни заболувања и рак на белите дробови. Во 2011 година, нивото на загадување од цврсти честички беше примарно одгвоорно за 485 нови случаи на хроничен бронхитис, 770 болнички приеми и 15.200 итни посети. Со намалување на ПМ10 и ПМ25 до европските гранични вредности ќе се избегнат повеќе од 800 смртни случаи и многубројни изубени работни денови, со што ќе се реализира заштеда во здравствени трошоци од 151 милиони евра годишно“, се нотира во извештајот на Банката.
Министерството за животна средина воопшто не се огласи по однос на извештајот на Светската банка, кој Македонија ја стави во рангот на најзагените земји.