Краткометражниот експериментален доку филм „Ø“ на авторката Вероника Камчевска ќе се прикажува во официјалната селекција на Меѓународниот фестивал Видеоарт – Ist Internatioanl Video Art Screening Program во Турција.
Филмот ќе биде прикажан на 25-ти и на 28 октомври во Измир. Фестивалот е биенален филмски и видеонастан со шетачка програма низ повеќе градови во Турција.
Филмот ја портретира концептуалната изложба на уметничката група „ЅЕЕ“ за проектот „Ø“, обидуваќи се да го деконструира ликовниот израз во видеоприказ.
„Филмот се бави со филмска форма која припаѓа на експерименталната естетска категорија. Но во современ контекст, филмот ги надминува тие жанровски класификации и на крај останува само сликата која се движи, клучна за оваа визуелизација“, вели Камчевска.
Експерименталниот филм „Ø“ на Камчевска е во конкуренција со филмови на автори од Египет, Филипините, Индонезија, Словачка, Кина, Русија, Јужна Кореја, Индија и други земји.
Исто така филмот е избран за полуфиналист во Париз на фестивалот Les Films de la Toile кој се одржува на Универзитетот 8.