Министерството за здравство ја чешла документацијата од Проектната единица задолжена за реконструкција на два објекти во Психијатриската болница во Брадовци за што е земен кредит кредит од три милиони евра Централна Европската Банка. По сторијата на НОВА за душевно болни пациенти кои седум години се иселени од зградата бидејќи реконструкцијата не е завршена, од Министерството велат дека бараат решение за проблемот за пациентите кои сместени во несоодветни услови, што побргу да се вратат назад.
Министерството за здравство и должи 900 000 евра на Фирмата „Ингра“ АД од Загреб која е изведувач на работите поради што изградбата е стопирана од декември минатата година. Фирмата го тужи Министерството за здравство и си ги бара парите со камата.
„ Во моментов се изнаоѓаат решенија за исплата на компанијата, која ги има извршено градежните работи, а истовремено и да се запази интересот на пациентите.
За таа цел, стручни лица од областа ја анализираат целокупната документација, додека на компанијата и се нуди можност исплатата да се одвива на неколку рати. Доколку истата за нив е прифатлива, тие би можеле да пристапат кон завршните градежни активности.
Крајната цел е унапредување на условите за третман и лекување на пациентите“, се вели во одговорот од Министерството за здравство.
Објектот во кој беа сместени околу 70 најтешките душевно болни(кои таму остануваат до крајот на животот), е почнат да се реконструира пред седум и откако застанаа работите за цело време е обезбедуван од тројца чувари.
Извори за НОВА од болницата потврдуваат дека болните се живеат во други одделенија, несоодветни за нив, каде условите се катастрофални, зад решетки, собите се пренатрупани со пациенти, а од таму се шири непријатна миризба. Зградата каде што треба да се вратат да живеат е речиси завршена, во неа има само уште еден месец работа, потврдуваат од фирмата изведувач на работите.
Во фирмата се зачудени на одговорот од Министерството за здравство бидејќи тие воопшто не биле контактирани, но велат дека се согласуваат парите да ги добијат на рати за конечно да биде завршена реконструкцијата и пациентите да се сместат во похуман третман. Од таму се сомневаат дека парите за оваа намена во време на екс министерот Тодоров и неговиот советник и прв човек на Проектната единица Јован Грповски кој се уште е на оваа позиција, парите ги пренамениле за нешто друго.
„ Се согласуваме парите да ги исплатат на рати, не е проблем. Но, како е можно средства од кредит да се исплатат на рати кога Банката не дозволува пренамена на средствата. Сето ова наведува на сомнеж дека парите биле пренаменети за реконструкција на други болници и сега ќе мора да се одвојува од буџетот“, изјави за НОВА, Делчо Арсоски сопственик на „Ингра“ АД.
Во 2009 година со кредит од ЦЕБ било предвидено да се изврши реконструкција на два објекти во болницата со површина од 4000 метри квадратни, во вредност од три милиони евра. На тендерот во 2010 година добила фирмата „Ингра“ АД од Загреб која требало да ги реконструира првото акутно и четвртото и петтото машко одделение. Изградбата од темел на првото одделение била завршена во дадениот рок, но проблемите се јавиле при реконструкцијата четвртото и петтото одделение каде што се сместени најтешко болните.
Изведувачот вели дека Министерството за здравство изгубило интерес и одбило да ги плаќа сметките поради што реконструкцијата на објектот се развлекла со години, за во декември минатата работата да биде комплетно стопирана.
Но, ова не единствен случај на злоупотреба на парите од кредитот на ЦЕБ. На истата фирма Министерството за здравство и должи 700 000 евра за изградбата на детската болница за белодробни заболувања во Козле. Целиот проект чинел 7, 5 милиони евра, од кои 3 милиони се донација од банката, тврди Арсоски.
Болницата во декември 2015 година свечено со сечење ленти ја пуштија во употреба екс премиерот Груевски и екс министерот Тодоров, а дури десет дена подоцна болницата доби дозволата за пуштање во употреба.