Емел Рамковска, ќерката на сопственикот на А1 телевизија Велија Рамковски, во вечерашното гостување на емисијата „Топ тема“ раскажуваше за она што и се случувало во изминатите години поминати во притворот во Шутка и затворот Идризово. Затворската казна што таа ја издржа беше шест години.
Таа првиот слободен викенд го добила после 4 години од казната. Нејзините адвокати барале притворот да и биде заменет со домашен притвор, бидејќи има три малолетни деца. Но, Судот тоа секогаш го одбивал.
-27 пати ми го продолжија притворот со реченица дека ирелевантно е што имам мали деца – рече Рамковска.
Таа порача дека нема да биде нејзина лична сатисфакција одговорните од претходната власт да одговараат, туку тоа е важно за пораката која ќе се испрати до општеството.
– Ми одредија притвор од 30 дена и мислевме дека ќе заврши лудилото, но следуваше и уште еден, па уште еден притвор. Толку беше страшно тоа што се случи што бевме среќни што сме живи – рече Рамковска.
Вели, успеала да преживее бидејќи верувала и знаела дека не направила ништо лошо и дека најголема сила и давало тоа што нејзините деца се добро.
– Во затворот во Шутка поминав 28 месеци и не ми дозволи да ги видам моите деца. Имав некои лекарски прегледи и тогаш само можев да ги видам. Морав да им ја кажувам приказната дека ние сме јаките и се бориме против лошите – раскажува Рамковска.
Со татко и Велија откако завршија во затвор, првпат се виделе во судница, каде што се задржувале по цели денови, па имале време да поразговараат и да бидат заедно.