Како што НОВА објави на 25 март, европските пратеници денес потврдија дека во понеделник ќе се одржи средба со претставници на ВМРО-ДПМНЕ и СДСМ во Брисел.
Оваа средба ја има целосната и безусловна поддршка на Европската унија и нејзините земји членки.
“Членовите на Европскиот парламент, Ричард Ховит (С&Д, Велика Британија), Едвард Кукан (ЕПП, Словачка) и Иво Вајгл (АЛДЕ, Словенија) ќе бидат олеснувачи на дијалогот помеѓу претставници од македонските политички партии ВМРО-ДПМНЕ и СДСМ во понеделник на 30 март 2015 година во просториите на Европскиот парламент. Овој состанокот ќе биде затворен за јавноста”, соопштија тројцата пратеници.
Според неофицијални информации, СДСМ во Брисел ја испраќа потпреседателката на партијата Радмила Шеќеринска додека ВМРО-ДПМНЕ треба да ја застапува министерот за надворешни работи Никола Попоски. Се уште нема потврда од двете партии дали токму овие политичари ќе допатуваат во Брисел.
Желба на европските пратеници е да им овозможат на двете партии да отворат пат за редовен политички дијалог низ кој потоа ќе се решаваат политичките, морални и кривични аспекти на актуелната криза. Тие се надеваат дека овој состанок ќе биде успешен и дека ќе овозможи следните средби да се одржат во Скопје но и понатаму со присуство на европските пратеници.