Овчите сипаници или варичела, се шират епидемиски во државата. Заболените се деца, а нивниот број достигнува и по 1000 месечно. Во Виница веќе била прогласена епидемија од оваа болест.
Епидемиолози кои работат на терен во училиштата и градинките за НОВА тврдат дека овие сипаници ги има преку целата година, не се сезонски и против оваа болест во Македонија не постои, односно не се набавува вакцина.
-Болеста се јавува кај мали деца, обично во градинка и тие си ја пренесуваат едни на други. Дури и родителите ги ставаат намерно во иста просторија со болни деца за да ја прележат варичелата. Кај возрасни ретко се јавува, или доколку се појави тоа е во форма на херпес зостер. За разлика од современите земји, во нашата држава нема вакцина против овчи сипаници, објаснува за НОВА епидемиолог кој сакаше да остане анонимен бидејќи само Министерството за здравство имало право да дава изјави за медиуми.
Единствен начин за справување на епидемијата е изолација на децата и дезинфекција во градинките велат епидемиолозите. Тие потенцираат децата кои имаат овчи сипаници, прво да оздрават, а потоа да се вакцинираат со другите вакцини.
Вирусот се пренесува преку воздухот, преку кашлање, кивање и меѓусебен контакт.
Она, што посебно ги загрижува лекарите се малите сипаници, односно морбилите. Поради пропусти во вакцинацијата и одбивањето на некои родители да ги вакцинираат децата, од морбилите од почетокот на годината има 14 случаи само во Скопје.Тие не биле во контакт меѓу себе, па затоа надлежните не прогласуваат епидемија.
-Секој ден имаме по некој нов случај и доколку само два случаи се поврзани меѓу себе се прогласува епидемија, велат во Центарот за јавно здравје.
Морбилите се многу заразна болест која лесно се пренесува преку допир на кожата или преку вдишување на респираторните секрети. Пациентите болеста може да ја пренесат во првите два дена пред појавата на симптомите и четири дена по појавата на осипот.
Првите симптоми се појавуваат по период на инкубација од 10 дена.
Во април 2011 во Македонија беше прогласена епидемија на морбили. Лекарите и сега стравуваат од појава на епидемија бидејќи вирусот циркулира во воздухот.