Кај 14-годишно девојче од едно средно училиште во Скопје постои сомнеж дека е заболено од морбили, дознава НОВА од свои извори. Случајот го потврдија и во Центарот за јавно здравје, но поради праксата изјави да се даваат на повисоко ниво, не сакаа да ги цитираме.
Епидемиолозите велат дека според клиничката слика се сомневаат и голема е веројатноста дека станува збор за морбили односно мали сипаници, но се уште чекаат на официјалните резултати. Случајот е пријавен вчера, а девојчето е веднаш изолирано во домашни услови и се третира соодветно.
За само една недела се појавија 3-4 случаи на заболени со морбили, сите на возраст од 30 до 40 години кои не се поврзани меѓу себе. Изворот на заразата се уште не е утврден.
Но, она што ги загрижува епидемиолозите е последниот случај на средношколката, а стравувањата се болеста да не започне да се шири во училиштата, со што би можело да дојде до епидемија.
Ова се случува во време кога државата не е подготвена да даде брз одговор со вакцинација, тврдат нашите соговорници. Извори за НОВА кои се добро упатени во оваа проблематика велат дека Македонија нема набавено поединечни вакцини против морбили, ниту има залихи од нив за вакви ситуации. Поради појава на морбили кај еден војник на АРМ, деновиве 1400 војници беа вакцинирани со MRP, односно со тривалентна вакцина против морбили, рубеола и заушки, наместо да добијат вакцина само против морбили.
.jpg)
-Сериозна држава треба да има набавено поединечни вакцини против морбили, како и полио кои се даваат интрамускуларно, кои се поскапи, посигурни и побезбедни. Тука, во овој дел треба да се прават реформите, а не да се штеди на човековото здравје и да се прават милионски тендери за медицинска опрема со која нема кој да работи, велат епидемиолози за НОВА.
Прашањето пред кое сме исправени сега е , зошто Македонија во последните години се соочува со епидемии, во 2009-та со заушки, а во 2010 и 2011 со морбили. Фрапантни се податоците кои НОВА ги доби од Институтот за јавно здравје. Бројките покажуваат дека во последните пет години во Македонија имало дури 17 235 заболени од заушки и 957 случаи со морбили.
Со ова, Македонија е меѓу рекордерите по бројот на заболени од овие две исклучително заразни болести, не само во регионот туку и во Европа. Во Србија во последните пет години имало 119 случаи на заушки и 300 со рубеола, во Босна и Херцеговина 161 случај на рубеола, додека во Романија, Полска и Украина исто така заболените се мерат во десетици илјади.
Експертите велат дека Македонија дури сега ги чувствува последиците од пропустите со вакцинацијата во изминатите неколку децении, па затоа се разболуваат возрасни луѓе каде што ризикот од компликации е поголем.
По осамостојувањето, државата останала затекната бидејќи немала искуство со распишување на тендери, набавките дотогаш се вршеле на централно ниво, во Југославија. Неколку генерации на деца останале не вакцинирани од повеќе заразни болести, исто како и деца од критичните региони кои не беа вакцинирани за време на конфликтот во 2001-ва.
-Доколку тука се додадат ниското ниво на вакцинација на ромски деца во одредени населби, како и интенцијата во последно време родителите да не сакаат да ги вакцинираат своите деца, Македонија може да има сериозен проблем во скоро време, велат епидемиолозите кои работат на оваа проблематика.
Лекарите нагласуваат дека негативната кампања против вакцинацијата која се води во некои медиуми, само допринесува луѓето се помалку да ги вакцинираат своите деца.
Тие потенцираат дека покриеноста со вакцинација сега се проценува на 95 проценти иако реално е опадна и треба да биде 99 проценти, но нагласуваат дека ниту една вакцина не штити 100 проценти од заразните болести.