Епидемилозите кои одат на терен за да тестираат или да направат епидемиолошка анкета кај заболени со ковид-19, многу често се соочуваат со отпор и одбивање да ги кажат луѓето со кои контактирале. Тие велат дека со часови ги молат да дадат податоци за лицата со кои контактирале да се стават во самоизолација. Лекари од Центарот за јавно здравје (ЦЈЗ) во Скопје, за НОВА велат дека често се соочуваат со закани, грубости, викање, некогаш и плачење само да не кажат со кого имале контакти.
„Имаме голема мака на терен. Некогаш со часови ги молиме да ги кажат контактите, одбиваат, не сакаат да ги кажат. Тешко се соработува, врескаат, некои се закануваат, други плачат. Само за да не кажат со кого биле во близок контакт. Се обидуваме по неколку пати, ги молиме. Дури и за себе велат дека немаат ништо, дека не се болни, туку дека некој ги „наместил““,раскажува за НОВА, една лекарка од ЦЈЗ-Скопје.
Покрај заштитната опрема, скафандери, маски, ракавици нивната работа ја отежнува несоработката со голем дел од граѓаните кои криејќи ја болеста и контактите ги ставаат во опасност и другите граѓани. Ова се случува кај сите без разлика на етничка припадност и одлика е на ниска свест и страв од стигматизација од средината, објаснува лекарката.
„Пред некој ден, една жена од село во близина на Скопје, пред да се врати на работа од која отсуствуваше два месеца, мораше да направи тест и тој излезе позитивен на ковид. Не знаете со какво викање се соочивме, дојде и нејзиниот сопруг, не сакаа да го земат Решението за самоизолација“, велат во ЦЈЗ -Скопје.
Внимавајте, предупредува лекарката-епидемиолог, не знаете кој поминува и застанува во вашата близина. Има и такви што излегуваат, се движат болни или не ја почитуваат самоизолацијата луѓе што биле во контакт со заболени.
И директорот Арбен Зибери посочи дека имаат многу проблеми на терен.
„Откако почна епидемијата работиме седум дена во неделата. Четири екипи одат постојано на терен. Дека сме добро опремени и организирани говори фактот што немаме ниту еден заболен од вработените. Одиме дома, ги молиме да се тестираат. Но, на терен имаме многу проблеми“, рече Зибери.
Токму за ваков случај во скопската општина Чаир беше побарана асистенција од полиција бидејќи семејството на починатиот од ковид, за кого резулатот дека е позитивен стигна после погребот, одбиваше да биде тестирано и да соработува.
Откога беше најавена МВР, семејството попушти и 20 члена од најблиските на починатиот вчера беа тестирани. Од ЦЈЗ велат дека полека почнале да ги кажуваат и контактите од погребот на кој и покрај забраната, биле присутни 200 луѓе. Некои од нив почнале и сами да се јавуваат.
И министерот за здравство Венко Филипче на последната прес-конференција посочи дека има многу граѓани кои не ги почитувале мерките за заштита, шетале за време на самоизолација, давале лажни податоци и адреси на живеење, се со цел да не им стигнат решенија за самоизолација.
Масовните дружења, седенки, ифтарски вечери, непочитување на дистанца и неносоње на маски, се причината за зголемениот број на случаи со ковид-19, како и новите кластери. Тој кажа дека најзагрозени се општините Сарај, Чаир, Гази Баба и Аеродром каде што има поголема концентрација на нови заразени од периодот на строгите рестриктивни мерки. Заразени се цели семејства. Зголемен е бројот на старите кластери, но има и нови.
„Епидемиолозите имаат серизозен проблем со луѓето, многу од нив даваат лажни податоци, кажуваат лажни адреси на живеење. Ние будно ќе ја следиме состојбата за време на викендот и почетокот на наредната недела, сè уште мислиме дека е ова варијација“, изјави министерот Филипче.
Тој најави дека доколку трендот на пораст на заболени продолжи и во текот на викендот и првите денови од оваа недела, се размислува да се воведе карантин во овие општини и тоа по примерот на Дебар, да се ограничи движењето надвор од општините, но и внатре во општините.