Турскиот премиер Реџеп Тајип Ердоган на денешниот митинг на неговата Партија за правдата и развојот, кој се одржа во Истанбул, упати критики до странските медиуми дека објавуваат неточни информации за случувањата во Турција.
„Ако медиумите ја сакаат сликата на Турција, ова е сликата на Турција. Странските медиуми се обидуваат да го скријат тоа. Повеќе денови даваа неточни информации. Тоа е не тој народ, кој вие го покажувавте“, истакна Ердоган, покажувајќи кон насобраните стотици илјади учесници на митингот.
Ердоган нагласи дека се сретнал со претставници на демонстрантите и со нив разговарал за ситуацијата.
„Моментално случајот со паркот Гези е пред суд. Ако судската одлука е во наша корист тогаш ќе спроведеме референдум, ако не е во наша корист тогаш ќе се согласиме. Овој парк не и припаѓа само на една група луѓе, туку на сите граѓани на Истанбул“, истакна турскиот премиер.
Ердоган додаде дека паркот Гези е испразнет, како и плоштадот Таксим.
„Овие места се дадени во рацете на народот, а општината го исчисти паркот. Моментално се работи на уредување на зелените површини“, рече премиерот.
Во своето обраќање пред приврзаниците, Ердоган потенцира дека „Турција не е земја на која можат да се вршат операции по пат на социјални мрежи и која можат да ја санкционираат некои парламенти“.
„Европскиот парламент донесе одлука во врска со нас. Треба да знаат до каде можат да одат. Имате ли вие било какви ингеренции во Турција? Првиот ден реков дека немаат право да донесуваат одлуки во врска со земјата. Одлуката која ми ја испратија им ја вратив назад“, изјави турскиот премиер.