Од сите буџетски корисници на национално ниво, Министерството за здравство е најнетранспарентна институција, а Министерството за финансии има најуспешни решенија како да не обезбеди податоци, покажало истражувањето на невладината организација ЕСЕ.
Анализата покажала дека Министерството за финансии сите информации што се однесуваат на буџетското и трезорско работење ги класифицира како информации со соодветен степен на тајност или се прогласува за ненадлежно за бараните информации. Ова Министерство е оценето како делумно транспарентно во делот на слободен пристап на информации од јавен карактер.
Министерството за правда, Комисијата за заштита на слободен пристап на информации, Институтот и Центарот за јавно здравје се отворени само доколку некој побара информации по официјален пат, но се затворени кога станува збор за самостојно објавување на информации за буџетското работење.
Она што е најинтересно овие институции предничат со статусот најтрансапрентни во однос на останатите.
„Министерството за здравство 2015 година го достигна дното во однос на проактивност, односно нема објавено ниту една информација за своето работење на официјалната интернет страна. Министерството за финансии е делумно транспарентно односно објавило 56 проценти од значајните информации, додека Фондот за здравство објавува 44 проценти од документите за своето програмско и буџетско работење“, стои во резултатите од спроведениот мониторинг на ЕСЕ.
Од таму констатираат дека нема никаков напредок на нивото на транспарентност на јавните институции во Македонија во однос на претходната година. Во прилог на тоа се податоците дека 13 од 20 мониторирани институции не објавиле ниту еден податок за своето програмско и финансиско и буџетско работење. Ниту една од дваесетте институции не објавила:буџетски календар, предбуџетска изјава, поедноставна верзија на буџетот или ревизорски извештај.
Според ЕСЕ, Министерството за финансии е единствената институција која минатата година објавила предлог буџет, усвоен буџет и измени и дополнувања на буџетот, како и Фондот за здравство кој објавил полугодишен извештај за извршување на буџетот.
Минимален напредок во нивото на проактивност се бележи кај следните институции:Министерствата за надворешни работи и образование, Општина Пехчево и Центарот за јавно здравје во Скопје. Во 2015 година бројот на барањата на кои институциите не обезбедиле никаков одговор е ист како во 2013 година.
Некои од институциите од целосно транспарентни стануваат нетранспарентни, како што се Градската болница„8Септември“и болниците во Прилеп и Струга. Од делумно транспарентно во нетранспарентно се претворило Министерството з а здравство, но и Клиниката за гинекологија и Центарот за јавно здравје во Кочани. Оваа анализа на проактивната транспарентност на јавните институции е трета по ред што ЕСЕ ја прави секоја година.
Со постапката за слободен пристап на информации биле опфатени вкупно 67 институции, како што се Секретарјатот за европски прашања, Агенцијата за странски инвестиции, Комисијата за заштита на слободен пристап на информации, како и министерствата кои беа потенцирани погоре во текстот.
Во текот на постапката за слободен пристап на информации биле доставени вкупно 922 барања за податоци од програмското и буџетското работење на институциите.
