Шефот на дипломатијата на Европската унија Кетрин Ештон изјави дека разговорите за спорната иранска нуклеарна програма ќе продолжат на 20 ноември откако новата рунда тридневни разговори не донесе договор.
– Остварени се конкретни резултати, но некои прашања остануваат да се разјаснат. Наша цел е да се дојде до заклучок и ние ќе се вратиме тоа и да го направиме, изјави Ештон.
Министерот за надворешни работи на Иран, Мохамед Џавад Зафир оцени дека лично не е разочаран што не е постигнат долго очекуван договор со светските сили за нуклеарната програма на Техеран.
Иранскиот претседател Хасан Рохани пак, изјави дека Иран нема да одговори на кои било закани, санкции и понижувања и дека Исламската Република постапува рационално во преговорите за спорната нуклеарна програма.
– Им рековме на преговарачките страни дека нема да одговориме на какви било закани, санкции, понижувања и дискриминации. Исламската Република не е и нема да ја спушти главата пред заканите од кој било авторитет, изјави Рохани во говор во Народното собрание.
– За нас постојат црвени линии кои не може да се преминат. Националните интереси се наши црвени линии кои ги вклучуваат нашите права во рамки на меѓународните права и правата за збогатување ураниум во Иран, изјави Рохани.