Само шест месеци по изборите, Бугарија повторно е во тешка политичка криза. Среде жестоките протести против владата, во која доминираат социјалистите, националистичката партија Атака денеска спречи важна собраниска седница.
Новата влада не може да го спроведе именувањето на нов заменик премиер.
Демонстрантите пред Парламентот бараат оставка на владата, коалиција на Социјалистичката партија со партијата на турското малцинство, ДПС. Демонстрантите во Бугарија денеска го опколија парламентот како одговор на повикот кој циркулираше на социјалните мрежи „испијте шолја кафе пред Народното собрание“, барајќи оставка од владиниот кабинет, јавуваат тамошните медиуми.
Најпрво демонстрантите биле пред задниот влез, за потоа полека да ја опколат целата зграда на парламентот, изразувајќи незадоволство од работата на пратениците.
Тие извикуваат „Мафија“ и фрлаат со домати.
Меѓу 7.000 и 10.000 луѓе демонстрираат секоја вечер од 14-ти јуни во Бугарија по контроверзното именување на медиумскиот магнат Дељан Пејевски на чело на бугарската служба за безбедност.