Најмалку четири лица се убиени во Каиро за време на протестите организирани од приврзаниците на соборениот претседател Мохамед Морси од Муслиманското братство, соопштува египетското Министерството за здравство.
Уште 40 луѓе се повредени по судирот на поддржувачите на Морси со сегашната влада која дејствува со помош на војската. Протестите во петокот се случуваа во Каиро и другите градови во земјата.
Според извори на Ал Џезира, во самиот центар во Каиро, се употребувале и автоматски пушки.
„Фрлен е солзавец на еден од мостовите во центарот на Каиро за да се спречат демонстрантите да дојдат до плоштадот Тахрир. Во Александрија, исто така, полицијата употребила солзавец за да ги одврати локалните жители да се борат со демонстрантите“, јавува дописникот на Ал Џезира.
Уште еден од изворите на светски агенции, пренесува дека воени возила пукале директно кон поддржувачите на Муслиманското братство во главниот град на Египет.
Војниците го блокирале плоштадот Тахрир со тенкови и бодликава жица додека демонстрантите извикувале „долу долу убијци“ – упатено до генералот на армијата, Абдел-Фатах ал-Сиси, кој го симна Морси од власта, откако милиони луѓе излегоа на улиците во летото барајќи тој да се повлече.
Истовремено, поддржувачите на војската се судриле со приврзаниците на Морси, употребувајќи огнено оружје и камења.
Повеќе од 100-тина полицајци се убиени во нападите и судирите по падот на Морси на 3 јули.