Додека македонските политички лидери се подготвуваат за нова средба, ЕУ им испраќа уште една порака на сериозна загриженост за лошата состојба во која се наоѓа земјата и потсетува дека препораката за преговори за членство е условена со примена на договорот од Пржино и Итните реформски приоритети познати кај нас како “извештајот на Прибе”.
Министрите за надворешни работи денес попладне ќе го усвојат заклучокот кој НОВА ви го пренесува. Овој заклучок ќе биде усвоен и на крајот на оваа недела од страна на лидерите на ЕУ на нивниот самит закажан за четврток и петок.
“Советот на ЕУ ја повторува својата сериозна загриженост за ситуацијата во земјата, особено сериозната политичка криза обележана со политичката култура на поделби, недостиг на култура за компромис, назадувањето на слободата на изразувањето и судската независност како и понатамошна ерозија на довербата во јавните институции”, вели ЕУ.
Во еден од своите досега најдолги заклучоци за Македонија, министрите го поздравуваат договорот од Пржино и бележат дека опозицијата се вратила во Собранието, како и усвојувањето на промените во изборниот законик и повикува на “целосна и конструктивна примена од сите партии согласно договорениот временски период во интерес на земјата и граѓаните”.
“Советот го повторува својот повик за поконструктивен и инклузивен политички дијалог во земјата. Советот ја подвлекува важноста дека изборите на 24 април 2016 година треба да се водат на кредибилен начин во согласност со меѓународните стандарди” и според препораките на ОБСЕ и ОДИХР.
Понатаму, ЕУ вели дека е многу важно да се спроведе длабока и независна истрага, без пречки, за сите сомненија за злоупотреби од прислушувањето и го поздравува именувањето на специјалната обвинителка и Анкетната комисија во Собранието кои треба да се фокусираат на “законската и политичката одговорност”. А властите треба да го поддржат независното функционирање на овие тела.
И тоа не е се. Советот се враќа на уште една чувствителна тема – настаните од Куманово. И ги повикува властите “целосно да ги истражат настаните од Куманово од 9-10 мај 2015 година на објективен и транспарентен начин”.
Потоа, Советот доаѓа до извештајот на Прибе и ги повикува партиите да го почитуваат дадениот збор за примена на реформите од овој извештај за “да се решат системските правила на правната држава вклучително и оние кои ги нарушуваат фундаменталните права, судската независност, слободата на медиумите, изборите, корупцијата, политизацијата на државните институции, нејасната граница помеѓу партија и држава и неуспешната контрола”.
Советот ја поздравува намерата на Европската комисија да продолжи да го набљудува процесот на решавање на овие системски проблеми во судството, корупцијата, фунадменталните права и внатрешните работи според извештајот на Прибе.
Советот се враќа и на прегледот на Охридскиот договор кој “треба да биде брзо комплетиран а препораките да се применат”.
Конечно, Советот потврдува дека нема никаква промена во односот на ЕУ кон спорот сои Грција. Проблемот, според ЕУ, треба да се реши во рамката на добрососедските односи со посредство на Обединетите Нации бидејќи тоа е “есенцијално”.
“Есенцијално” значи дека без согласност на Грција преговорите за членство не можат да се отворат. Очигледно дека спорот нашол свое место за време преговорите во Пржино: “Советот позитивно ја бележи определбата на лидерите на главните политички партии според договорот од 2 јуни. Потребно е да се доведат до дефинитивен заклучок долгите дискусии за проблемот со името и тоа без одлагање. Акции и изјави кои имаат негативно влијание на добрососедските односи треба да се избегнуваат”, вели заклучокот на инсистирање на Грција.
На крајот, Советот на ЕУ изразува подготвеност да ја продолжи својата препорака за преговори за членство која е условена со примената на Пржино и значаен напредок во примената на извештајот на Прибе.
Шефовите на евопските дипломатии ветуваат дека на македонските проблеми и условената препорака ќе се вратат веднаш во изборите на 24 април 2016 година.