ЕУ најави дека изминатата ноќ постигнала договор за буџетот за 2014 година. Европскиот парламент (ЕП) бараше 1,4 милијарди евра повеќе но на крајот се согласи со сумата со 135,5 милијарди за исплата наместо бараните 136,4 милијарди, прецизираше Европската комисија (ЕК).
Со тоа буџетот се намалува за 9,4 отсто во однос на оној од 2013 година а причината за тоа се финансиските тешкотии на ЕУ.
Договорот треба да биде формално потврден на 19 и 20 ноември од страна на Советот на министрите и ЕП. Истовремено ова отвора пат за усвојување на буџетот за периодот 2014-2020 кој треба да биде изгласан во ЕП на 19 ноември.
Буџетските дискусии кои секоја година се долги во ЕУ овој пат беа договорени и покрај барањата на Велика Британија, Шведска, Холандија и Данска кои се приврзаници на постриктна буџетска дисциплина и одбиваат буџетско зголемување, јавува белгиската агенција Белга цитирајќи извор од преговорите.
Министерот за финансии на Литванија, претседавач со ЕУ, го поздрави “финансирањето на приоритетни сектори како развојот, вработувањата и хуманитарната помош” особено за сириските бегалци.
На барање на Италија, го драмата во Лампедуза, зголемени се фондовите за менаџирање на имиграцијата кои ќе и бидат доделени на агенцијата Фронтекс.
Освен тоа дадени се фондови за финансирање на транспортната инфраструктура и помош за малите и средни претпријатија.