Турција ја предупреди германската канцеларка Ангела Меркел да не ги политизира нејзините европски амбиции додека Берлин ги блокира обидите следната седмица да се отвори ново поглавје во пристапните преговори на Анкара со ЕУ.
Турција соопшти дека неуспехот во отворањето на новото поглавје би претставувало големо назадување во односите меѓу Анкара и Брисел, а еден висок турски функционер изјави дека тоа „би предизвикало силна реакција”.
Повеќето земји членки на Европската унија дадоа сигнали дека сакаат следната среда да дојде до долгоочекуваниот напредок на турскиот пат кон ЕУ сметајќи дека Европа би требало да го искористи сѐ поголемото влијание на Турција на Блискиот исток.
Германија, меѓутоа, ја критикуваше насилната реакција на премиерот Реџеп Тајип Ердоган на повеќенеделните протести и одбива да одобри отворање на новата преговарачка област, прва во последните три години од преговорите.
Германија го блокираше отворањето на новото поглавје коешто се занимава со регионалното финансирање во четвртокот на состанокот на амбасадорите на земјите членки на ЕУ, соопштија дипломатски извори од ЕУ.
Од ЕУ засега не ги откажаа разговорите со Турција планирани за следната среда изјави еден европски извор, додавајќи дека владите се договориле дека за тоа прашање ќе размислат во текот на викендот и можеби ќе се навратат на него следната седмица.
Конзервативците на Меркел го отфрлија членството на Турција во ЕУ во својата програма за германските избори, изјавувајќи дека таа земја би ја „преоптоварила” ЕУ поради својата големина и економијата со што го предизвика гневот на Анкара.
„Доколку госпоѓа Меркел бара домашен политички материјал за своите избори, тој материјал не би требало да биде Турција. Доколку госпоѓа Меркелс се позанимава со тоа, ќе види дека оние кои се конфронтираат со Турција немаа среќен крај”, изјави за новинарите во четвртокот турскиот министер за ЕУ, Егемен Багиш.
Спротиставувањето на Германија на влезот на Турција во ЕУ се зголеми последните години и сега две третини од Германците се противат на турското членство, покажуваа резултатите од најновото истражување на јавното мнение што го направила агенцијата Forse објавени во четвртокот во списанието Stern.