Франција е во шок. На вчерашните европски избори екстремно-десниот Национален фронт освои 24,95 отсто гласови со што стана најсилната политичка сила во земјата. Десниот УМП на поранешниот претседател Никола Саркози освои 20.79 отсто а вистинскиот ладен туш го доживеаа социјалистите со 13,98 осто гласови. На ова треба да се додаде и лошиот резултат на локалните избори кои се одржаа во март каде што Националниот фронт исто така завладеа во многу француски општини.
Европскиот печат денес го пренесува овој француски шок зборувајќи за “политички потрес”. Германскиот “Франкфутер цајтунг” вели дека сето ова ќе има важни последици за Франција но и за Европа. Европскиот печат заклучува дека ова е “огромен пораз за претседателот Франсоа Оланд” кој од овие избори излегува ослабнат политички.
Франција со ова влегува во еден вид политичка криза. Од рано наутро во Елизејската палата социјалистите одржуваат кризни состаноци во потрага по решенија. Но засега нема најави за распуштање на Парламентот како што тоа синоќа го побара Марин Ле Пен по соопштувањето на резултатите.
Премиерот Мануел Валс рече дека таков чекор не е на дневен ред: “Ова не е прв пат оние што ја водат земјата да бидат непопуларни”, рече Валс. Тој смета дека со распуштање на Парламентот и препуштање на власта на Националниот фронт земјата би влега во хаос. Наспроти тоа, Валс ветува забрзување на реформите во Франција.
Во шок се социјалистите но и десницата која за прв пат има помалку гласови на избори.
Според програмата на Националниот фронт оваа партија има неколку клучни барања помеѓу кои и излегувањето на Франција од еврото што е срцето на проектот на партијата во ЕУ.
Освен тоа, Националниот фронт смета дека Трансатлантската повелба, која е во преговори помеѓу ЕУ и САД, е “воена машина, ултралиберална, антодемократска и антиекономска” и дека Франција треба да излезе од преговорите. Во спротивно Франција, вели партијата, “утре ќе јаде говедско со хормони и модифицирано пиле какви што масовно се произведуваат во САД”.
Националниот фронт бара излегување на земјата од заедничката земјоделска политика на ЕУ и креира на француска. Помеѓу другите идеи за ЕУ Националниот фронт бара исто така излегување на земјата од Шенген зоната и прекин на сите легализирања на престојот на странците во Франција. Според партијата Франција може да прими за 10.000 странци годишно.
Францускиот претседател утре, вторник, доаѓа во Брисел на самитот на ЕУ каде што исто така ќе биде потсетен на “кафеавиот бран” кој ја зафати Франција.