Ангела Меркел не се согласува со затворање на балканската рута за бегалците.
Германската канцеларка засега одбива да се согласи со нацрт верзијата на заклучокот на денешниот самит во Брисел на ЕУ и Турција на која тема е бегалската криза.
– Ништо не треба да се затвора. Она што е важно е да се најде трајно решение со Турција, изјави Меркел денес во Брисел и предупреди дека овој самит може долго да трае.
Меркел доби поддршка и од претседателот на Европската комисија (ЕК) Жан-Клод Јункер кој исто така не се согласува со нацрт верзијата која НОВА ви ја пренесе во неделата вечер. https://novatv.mk/index.php?navig=8&cat=2&vest=27710
– Бранот на бегалци на западно-балканскиот пат го допира својот крај. Оваа рута е отсега затворена, пишува во нацртот на самитскиот заклучок напишан синоќа.
Ова беше замислено како силна порака до сите бегалци да не тргнуваат кон Балканот на нивниот пат кон ЕУ. Во текот на минатата година околу милион бегалци поминаа по овој пат.
Поради рестрикциите што го наметна пред се Австрија, денес над 30.000 бегалци и мигранти се блокирани во Грција во тешки услови а од нив 13.000 се наоѓаат на границата со Македонија.
Портпаролот на Меркел, Кристијан Вирц, изјави дека слушнала за информациите за затворање на балканскиот пат. Таа прецизираше дека станува збор за шпекулации_ “Преговорите и разговорите се во тек и треба да се почека”, изјави таа на редовниот прес брифинг во Берлин.
Според агенцијата АФП, текстот на заклучокот во моментов се менува и се чини дека реченицата во која се најавува затворање на балканскиот пат е извадена од текстот.